Na Bakari Mwakangwale

 

SHEIKH Hassan Swaleh, aliye maarufu na bingwa wa kusoma Qur an Duniani, leo anatarajia kuswalisha Swala ya Ijumaa, katika Msikiti wa Kichangani, uliopo Magomeni Jijini Dar es Salaam.

 

Sheikh Swaleh, aliye Imamu wa Islamic Centre  New Jez, nchini Marekani ni maarufu kutokana na uhodari wake wa usomaji wa Qur an kwa Viraa tofautitofauti kwa sauti ya kuvutia, aliwasili nchini Tanzania, usiku wa kuamkia Jumanne wiki hii.

Sheikh Swaleh, yupo nchini kwa ziara maalum chini ya Jumuiya ya kuhifadhisha Qur’an nchini Tanzania, ambapo siku ya Alkhamisi Machi 18, 2021, aliswalisha Swala ya Isha Masjid Idirisa Kariakoo, Dar es Salaam.

Katika muendelezo wa ziara yake leo Ijumaa, Sheikh Hassan, atasoma Qur’an kabla ya Ibada ya Swala ya Ijumaa katika Msikiti wa Kichangani Magomeni Dar es Salaam,  kisha ataswalisha Swala ya Ijumaa katika Msikiti huo wa Kichangani.  

Ratiba ya Sheikh Hassan, inaonyesha kuwa majira ya saa 11 jioni, leo (Ijumaa) atakutana na wasomaji wa Qur’an, katika Madrsat Muhammda, iliyopo Masjid Mtoro, Kariakoo Dar es Salaam.

Akiwa Masjid Mtoro, Sheikh Hassan atapata fursa ya kuswalisha Swala ya Magharibi, kisha atasoma Qur an baada ya Swala hiyo ya Magharibi.

Aidha, siku ya Jumamosi Machi 20, 2021,  Sheikh Hassan, atahudhuria Mashindano makubwa ya Qur an Tukufu, yatakayo fanyika katika kituo cha Rahma Wailayani Mkuranga Mkoa wa Pwani, kilicho chini ya Mwenyekiti wa Jumuiya ya Kuhifadhisha Quran Tanzania, Sheikh Othman Ali Kaporo.

Akizungumzia ujio wa Sheikh Hassan, Sheikh Othman Kaporo, alisema Sheikh Hassan Swaleh, amefika salama  nchini siku ya Jumanne wiki hii na kwamba wanatarajia kheri nyingi na mafanikio makubwa katika ziara hiyo.

Alisema, lengo kuu ya ziara ya Sheikh Hassan nchini, ni kuona ni kwa namna gani vijana wa Kiislamu wa Kitanzania wanaisoma Qur an, kwa ufasaha na kwa utaratibu ulio mzuri.

“Baada ya kuwaona na kuwasikiliza vijana wetu atapata njia nzuri zaidi ya yeye kuona anatusaidia vipi kutokana na uwezo na mbinu walizokuwa nazo wao kwa sababu wenzetu wana njia nyingi za maendeleo ya usomaji wa Qur an, tunataraji tutafaidika katika ziara yake hii na msafara wake kwa ujumla.” Amesema Sheikh Kaporo.

 

        

 

Latest News