Apotosha aya 82 katika Surat Yasin

”Septemba 11”, bado inatesa Waislamu

           Na Omar Msangi

Wakati tukiendelea na kampeni za uchaguzi, yapo mambo yanahitaji kupewa tafakuri ya kina kwa masilahi ya amani ya nchi yetu na mshikamano wa wananchi.

Hivi karibuni katika kunadi sera zake, Askofu wa Kanisa la Ufufuo na Uzima, Josephat Gwajima katika kuanza hotuba yake alisema maneno ambayo kwa hakika ni ya kejeli na dhihaka kwa Qur’an ama tuseme ya kupotosha huku wanaomsikiliza wakishangilia.

Askofu Gwajima alisema, kwa Waislamu kuna kitu kinaitwa “Kun Fayakun” akaitafsiri kwa kusema kwamba “mtu akikujibu upuuzi unamjibu upuuzi. Akikujibu vizuri unamjibu vizuri.”

“Kun Fayakun”, ni sehemu ya aya ya 82 ya Surat Yasin, ambayo inasema: “Innamaa amruhuu idhaa araada shaian, an yaquula lahuu KUN FAYAKUN.”

Ikimaanisha kwamba “Hakika amri Yake (Mwenyezi Mungu) anapotaka chochote (kile kitokee) ni kukiambia tu: KUWA BASI MARA HUWA.” (36:82)

 Tunaamini kwamba vyama vya siasa vina Ilani zao za uchaguzi. Pengine ingekuwa vyema wagombea wakatumia Ilani zao kunadi sera zao au hata kutumia vitabu vya Mwalimu Nyerere. Hii italeta sura ile ambayo anaisisitiza Gwajima mara kwa mara kwamba watu wasimtazame kwa cheo chake cha ‘Askofu’ kwani ‘Askofu’ ni heshima tu ya kidini. Kwamba, suala la msingi ni kuwaletea wananchi maendeleo, sio “Wadhifa wake wa Askofu”, kama ambavyo haikuwa tatizo kwa Rais Mstaafu Ali Hassan Mwinyi ambaye alikuwa Alhaji.

Kuleta dhihaka katika mambo ya kidini, inaweza kuleta kumbukizi ya maneno mengine aliyowahi kusema Askofu Gwajima kwamba ana ndoto ya kuifanya Misikiti kuwa “Sunday Schools” na Masheikh kupigana vikumbo wakikimbilia kupiga goti mbele ya Msalaba.

Niseme kwamba, ni kweli kama alivyosema Gwajima kwamba, kuwa Askofu sio hoja, lakini tunajiuliza, ingekuwa ni Sheikh “Kipozeo” kasema kwamba atahakikisha Makanisa yanakuwa Madrasa na mahali pa kupiga Adhana mara tano kwa siku, tungekuwa na Kipozeo hivi leo katika kinyang’anyiro hiki cha kuwakilisha wananchi Bungeni?

Hivi sasa tupo katika zama za Vita Dhidi ya Ugaidi ambapo Waislamu wengi wapo magerezani (rumande). Lakini zilipita zama za “kashfa za kidini”, ambazo nazo ziliumiza sana Waislamu. Tunajiuliza, hivi kejeli na dhihaka ile iliyofanyiwa maneno Matukufu ya Mwenyezi Mungu yaliyo Ndani ya Qur’an tukufu na ndani ya moja ya Sura muhimu katika Qur’an, ingekuwa ni kinyume chake, hadhira ingeshangilia kama ilivyoshangiliwa pale Kawe? Hadi hii leo kungekuwa kimya kutoka viongozi wa Kidini, Vyama vya Siasa, Tume ya Uchaguzi na Mamlaka nyingine za dola?

Upo mchezo wa watoto wakiimba, nyoka, nyoka huyo, wanaitikia apitee? Wanakwenda hivyo, toka nyoka akiwa mbali mpaka anafika mguuni, wanakimbia wanaingia ndani au wanajificha.

Wakati mwingine tukizungumzia ‘udini’ tunaweza kutazama Darfur, India, Burma, na Afrika ya Kati. Hali hiyo haitatusaidia sana. Tuutazame ‘udini’ na tujiulize, je, nyoka hayupo mguuni mwetu?

Mwaka 2003 OIC waliandaa semina iliyofanyika Kampala juu ya masuala ya utamaduni. Katika semina ile Profesa Ali Al'amin Mazrui alikuwa mgeni wa heshma, ikatokea akaulizwa, ugaidi ni nini na nani gaidi kwa muktadha wa Vita dhidi ya ugaidi iliyokuwa ikiendelea. Katika kujibu swali hilo, Prof. Mazrui akaeleza kwamba, yeye ameishi Marekani kwa muda mrefu sana na baadhi ya watoto wake wana uraia wa Marekani kwa vile walizaliwa kule. Lakini pamoja na yote hayo, akifika uwanja wa ndege hupekuliwa zaidi kuliko wanavyopekuliwa Wamarekani wasio Waislamu. Akaeleza kwamba katika tukio moja baada ya kupekuliwa sana akaambiwa vua, viatu. Akauliza hivi mnadhani nimeficha bomu katika viatu. Akacheka sana. Askari wakamuuliza kwa nini anacheka. Jibu lake likawa kwamba yeye kazoea kuvua viatu akiingia msikitini sio katika ofisi za uhamiaji. Hilo likawa kosa. Ikawa kule kijitetea ndio kafanya kosa kubwa zaidi.

 “Naona labda ukionewa ukajitetea, ndio ugaidi.” Alijibu Prof. Mazrui.

Katika utafiti uliofanywa na Chuo Kikuu cha Brown, Marekani, wakiangalia gharama ya Vita Dhidi ya Ugaidi (Costs of War Project), wakakuta kwamba vita hiyo imegharimu roho za watu kwa mamilioni na wengine milioni 37 wakiwa wamepoteza makazi yao. Katika makala ya uchambuzi juu ya suala hilo iliyopewa anuwani: “Tens Of Millions Of People Displaced By The ‘War On Terror’, iliyoandikwa na Caitlin Johnstone, inaelezwa kwamba unapozungumzia waathirika wa Vita Dhidi ya Ugaidi, unapozungumzia mamilioni ya watu waliouliwa bila ya hatia katika Vita Dhidi ya Ugaidi, unazungumzia Waislamu. Hawa ndio waliouliwa kwa mamilioni na wanaendelea kuuliwa. Hawa ndio wanaoendelea kuteswa Guantanamo na kuendelea kushikiliwa katika magereza mbalimbali kwa miaka mingi sio kama wahalifu waliohukumiwa, lakini mahabusu wanaosubiri kesi.

Akichambua hali hiyo, Johnstone anahoji, ni kwa nini vita hii bado inaendelea? Kwa nini bado wanaendelea kuuliwa na kuteswa Waislamu wasio na hatia?

Johnstone anasema, swali hili ni muhimu kwa sababu kinachoonekana sio kuondoa ugaidi, bali ni mauwaji na kuleta tu shida miongoni mwa watu wasio na hatia. Katika uchambuzi wake anasema kwamba katika hali ya kawaida, inatarajiwa kwamba binadamu wanaofanyiwa unyama na ukatili huo kutokana na kubambikiwa kesi za ugaidi, watamchukia anayewaonea na kuwauwa bila ya hatia na watataka kulipa kisasi. Wanaoonewa wakilipiza kisasi, wanatangaziwa ugaidi zaidi na hivyo kupatikana sababu ya kuhalalisha na kuendelea na hatua namba moja kuwabamiza zaidi.

Na huo ndio mchezo unaofanywa na mabeberu na Wazayuni. Kuendeleza vita dhidi ya ugaidi bila kikomo ili kutengeneza kisingizio cha kuendeleza vita ya kupigania masilahi ya mabeberu na Wazayuni Mashariki ya Kati na dunia kwa ujumla.

Mwandishi ameyazungumza haya akitazama yaliyofanyika Afghanistan, Iraq, Libya, Somalia na Syria ambapo ni nchi inavamiwa na kupigwa kwa sababu za uwongo. Lakini unaweza kuyaleta pia katika mazingira ya ndani ya jamii. Katika taarifa moja iliyotolewa na Jarida Moja nchini Marekani, imeelezwa kwamba katika hali isiyoeleweka, Vita Dhidi ya Ugaidi imekuwa ikiwalenga Waislamu pekee jambo ambalo linaibua maswali tata yasiyo na majibu.

Ndani ya uchambuzi huo, “The War on Terror Has Targeted Muslims Almost Exclusively”, mwandishi Mahal Hilal anasema kuwa, ilielezwa na serikali kwamba vita hiyo ni kwa ajili ya kuifanya Amerika na dunia kwa ujumla kuwa mahali salama, lakini imewafanya jamii ya Waislamu pekee kuwa wahanga huku kukiwa na kila dalili kwamba lengo si ugaidi, bali ni mkakati wenye dhamira mbaya kwa masilahi ambayo si rahisi kwa mwananchi wa kawaida kuyafahamu.

Akirejea shambuli la Septemba 11, amesema kwamba Rais Bush alitangaza kwamba hana ugomvi na Waislamu wala Uislamu, lakini kadiri watu wanavyokamatwa, kuteswa na kuuliwa, unaona kabisa kwamba kuna watu maalum wanalengwa huku matukio mengine yakiwa ni ya kupanga. Tangu hapo Waislamu walifanya kusingiziwa tu na hiyo Septemba 11. (Tazama: 9/11…How America was neoconned into World War IV).

Katika makala hiyo mwandishi Laurent Guyenot anasema kwamba lililodaiwa kuwa shambulio la kigaidi Septemba 11, 2001 ambapo walituhumiwa Al Qaida, lilikuwa tukio la kupanga-False Flag Operation” na kwamba, Osama bin Laden hakuhusika kabisa.

Ripoti ya Shirika la Human Rights Watch ya mwaka 2002 inaeleza kwamba Wizara ya Sheria Washington na FBI (Federal Bureau of Investigation), wanahujumu Waislamu kwa kuwabambikizia tuhuma za ugaidi kupitia mpango mashuhuri “Entrapment” au “Sting Operation”.

Katika ripoti hiyo ya kurasa 214 ikiwa na kichwa cha habari: “Illusion of Justice: Human Rights Abuses in US Terrorism Prosecutions,” inaelezwa kuwa watu wengi waliokamatwa na kuteswa kwa tuhuma za kigaidi, wanahusishwa na matukio ambayo yakichunguzwa kwa undani, utaona kwamba yasingefanyika kama si kwa kusukumwa, kushawishiwa na hata wakati mwingine kulipwa fedha na taasisi za dola.

Katika utaratibu huu, FBI hutumia ‘wanaharakati feki’ wa Kiislamu kupandikiza mawazo ya kigaidi miongoni mwa Waislamu kisha kuwa sababu ya kuwakamata na kuwatesa wakiwabambika kesi ya ama kuhifadhi magaidi au kupanga njama za kutenda ugaidi. Mfano ni namna alivyotumiwa ‘Muislamu’ feki aliyejidai kusilimu Craig Monteilh katika Misikiti ya California. (Tazama: FBI Using Fake Muslim Converts or Missionaries to Entrap Muslims-By Teresa Watanabe and Paloma Esquivel, Los Angeles Times, March 1, 2009)

Tazama pia: Fake terror plots, paid informants: the tactics of FBI 'entrapment' questioned-Critics say bureau is running a sting operation across America, targeting vulnerable people by luring them into fake terror plots, iliyoandikwa na Paul Harris (Deputy Editor of news for Guardian US) iliyochapishwa katika gazeti la Guardian la tarehe 16 Nov 2011.

“The US government should stop treating American Muslims as terrorists-in-waiting.” Anasema Andrea Prasow, ambaye ni Mkurugenzi Msaidizi wa Human Rights, Washington, na mmoja wa wakusanyaji na waandishi wa taarifa ya HRW.

Habari kutoka Kenya zinasema kwamba tarehe 20 Agosti, 2020 askari walio sheheni silaha wakificha nyuso zao, walivamia shule ya Kiislamu, Markaz Noor Madrassa, iliyopo Mtondia Kilifi North, na kuwakamata Ustadh Khalid Swaleh, Ustadh Juma Shamte na Ustadh Hassan.

Kabla ya kuondoka, askari hao walifanya upekuzi katika nyumba za walimu hao wa madrasa na kuharibu camera za usalama (CCTV servers) za Kituo hicho cha Kiislamu.

Taarifa ya Andrew Kasuku na Brian Ottieno katika magazeti zinasema kuwa, pamoja na kuwakamata walimu hao wa madrasa, makachero hao wanaodhaniwa kuwa ni wa kikosi maalum cha kupambana na ugaidi (Anti-Terror Police Unit squad-ATPU), waliwapiga wanafunzi na kuwapekua. Hadi sasa haijajulikana Masheikh hao wamefichwa wapi huku polisi wakikanusha kuhusika au kujua lolote juu ya operesheni hiyo.

 

Jumatatu ya tarehe 14/09/2020 saa 5 usiku, Aljazeera walirejea kurusha documentary juu ya kushambuliwa meli ya kijeshi ya Marekani USS Liberty tarehe 8 Juni, 1967 ambapo waliuliwa askari wa Marekani 34 na kujeruhi wengine zaidi ya 171. Katika documentary hiyo: “The Day Israel Attacked America — Remember the USS Liberty, inaelezwa kuwa Israeli ilishambulia meli hiyo ikikusudia kuizamisha kabisa na kisha kuisingizia Misri ili kuivuta Marekani katika Vita ya Siku 6 ya mwaka 1967 ishiriki kumpiga Rais Gamal Abdul Nasser. Mpango huo wa “kigaidi” uliitwa “Operation Cyanide”.

 

Katika mlolongo wa matukio ya kuuliwa Masheikh na Waislamu Kenya, Aljazeera wametoa documentary nyingine walioipa jina Inside Kenya's Death Squads ambapo makachero wa kikosi cha kupambana na ugaidi, wanakiri kutumia mbinu waliyoiita "elimination" of suspected Muslims, wakimaanisha kuuwa Waislamu watuhumiwa wa ugaidi kwa kuwapiga risasi.

 

Aidha, wanaeleza kuwa katika kuuwa watuhumiwa hao, wanapokea maelekezo kutoka kwa makachero wa Israeli na wao hutekeleza kwa kuwapiga risasi Waislamu, si kwa wao wenyewe polisi kuchunguza na kuona kwamba ni magaidi, lakini kwa kupewa orodha ya majina na wale walioipiga USS Liberty ili wapate kuisingizia Misri!

 

Mwandishi Philip Girald katika Makala yake “Democrats Go All-Out for Israel” (September 15, 2020) anasema kwamba kwa wale ambao walikuwa na tamaa kwamba Marekani itabadili siasa zake Mashariki ya Kati zinazowabambika Waarabu na Waislamu ugaidi na hivyo kuzua vita vya uonevu tu, wasahau kwa sababu wagombea kupitia chama cha Democrat, Bwana Joseph Robinette Biden Jr. na Bi Kamala Devi Harris, wote wamekamatwa na Wazayuni, hawafurukuti.

“The Democratic Party leadership is owned by Israel through its big Jewish donors whose billions come with only one string attached, i.e. that the Jewish state must be protected, empowered and enriched no matter what damage it does to actual U.S. interests. Anasema Philip Giraldi.

Kwa hiyo, chama chochote kitakachoshika madaraka, jambo la mwanzo ni “Maslahi ya Israeli”, bila kujali maumivu ya yeyote, hata ikibidi kuumia Wamarekani wenyewe.

Na hili limethibitishwa na Rais Trump katika mkutano wake wa kampeni tarehe 8 Septemba, 2020, Winston-Salem, North Carolina, aliposema kwamba Marekani ina agenda ya kuilinda Israeli na hivyo lazima itaendelea kuwepo Mashariki ya Kati.

Kwa msingi huo, Philip Giraldi anasema: “Baada ya tarehe 3 Novemba, haijalishi nani anashinda uchaguzi (Trump au Biden), Israeli itanufaika na itakuwa huru kuwafanyia lolote Wapalestina waliosalia mpaka wote watokomee (na kuiacha ardhi yao ikaliwe na Wayahudi).”

Hawa ni Israeli ambao kwa mujibu wa documentary ya Aljazeera (Inside Kenya's Death Squads) wana nafasi kubwa katika kukamatwa na kuuliwa Masheikh Kenya kwa tuhuma za ugaidi.

Hatujui ni kwa kiwango gani “Sting Operations” za FBI na ‘michezo’ kama ile ya “Dancing Arabs” ya akina Yaron Shmuel na Oded Ellner,  imekuwa sababu, na itaendelea kuwa sababu ya Waislamu kuendelea ‘kubamizwa’ na tuhuma za ugaidi!

Lakini kama nilivyosema katika makala ya wiki iliyopita, bado tuna Imani kwamba benki ya haki haijawahi kupungukiwa na hivyo suala kama la Masheikh walio ndani, laweza kutazamwa na kupatiwa ufumbuzi wa haki.

Mwanadamu yeyote, katika hali ya kawaida, lazima ataguswa na kadhia ya mtu, iwe mwananchi wa kawaida, Sheikh, Askofu au mwanasiasa, kuwekwa ndani miaka saba bila ya kesi juu ya tuhuma zinazomkabili kuzungumzwa. Yupo ndani tu akisubiri uchunguzi!!!

Pengine Kamati yetu ya Kitaifa ya pamoja ya Maaskofu na Mashekhe ya Maadili, Amani na Haki za Binadamu kwa Jamii ya Madhehebu ya Dini, ingetumia nafasi na mamlaka yake iliyopewa na Jamii ya Watanzania kulisemea zaidi suala la Haki maana Haki ndio Msingi Mkuu wa Amani