Hashim Saiboko

NAJIULIZA katika hili Sakata la Spika Ndugai na CAG Profesa Mussa Asaad "suala la msingi nini?".

Kwenye taaluma ya kemia ukileta kichupa ukasema humu ndani kuna kemikali fulani, kama yuko anayepinga hawezi kusema mimi sikubali! Kichupa kinapelekwa maabara kunafanyika ‘qualitative analysis’ majibu yanatoka, ubishi unafungwa!

Huku kwenye siasa formula hii haiwezi kutumika?

 CAG katoa hoja gani kushikilia msimamo wake kwamba kuna udhaifu? Mwalimu kama mimi ningekuwa ndiyo Mhe. Spika, ningehangaika na kuvunja hoja za CAG kisha kumshitaki kwa kosa la kutoa tathimini isiyokuwa sahihi. Au kusema uongo dhidi ya Bunge!

Inapokuwa hili halitokei, wananchi tunajiuliza nini maana ya kutofanya kazi na Prof. Mussa Assad lakini ukadai kufanya kazi na ofisi ya CAG? Kama hoja ni kwamba akifa ofisi itakuwepo hiyo nayo ni hoja dhaifu kwa sababu akifa atateuliwa CAG mwingine.

Nini athari ya Bunge kutofanya kazi na CAG? Je, watamnyima taarifa za matumizi ya mhimili huu hivyo CAG kushindwa kukagua matumizi ya Bunge?

Je, Bunge lina mamlaka hayo? Kama linayo nani atakuwa anafanya kosa kati ya anayezuia mamlaka halali kutekeleza majukumu yake na anayetaka kufanya kazi yake?

Je, ripoti ya CAG inahitaji kuthibitishwa na Bunge? Ili tuseme kwamba kama hawataithibitisha ndiyo CAG atakuwa hajafanya kazi? Je ipo sheria au kanuni inayomtaka CAG kujiuzulu kama Bunge likipitisha azimio la kutopenda kauli zake?

Kuna wanaosema mkutano wa Spika Ndugai na waandishi wa habari ulikuwa na lengo la kuuarifu umma kwamba ripoti ya CAG itajadiliwa na Bunge. Imekuwa kama kuwatangulia wana habari!!

Labda lengo lingine lilikuwa kuufahamisha umma kwamba Bunge limeshtusha na kitendo cha CAG kuwa hajajiuzulu hadi sasa. Ndiyo kusema kwamba hayo ndiyo yaliyokuwa Mategemeo ya Bunge!!! Tusubiri.

Dar es Salaam.