Hofu yatanda kwa Waislam

Ndio wahanga wakubwa wa vita hiyo

Na Bakari Mwakangwale

VITA dhidi ya ugaidi, inayoendeshwa na mataifa mbalimbali ulimenguni ikiwemo Tanzania, imepelekea Waislamu kuishi katika hofu kubwa, kwani wao ndio wahanga wakubwa wa vita hiyo.

Hayo yamebainishwa na mchambuzi wa masuala ya kisiasa nchini Mwalimu Njonjo Mfaume, akichambua kauli za Kamanda Simon Sirro, alizozitoa hivi karibuni zikilenga dhana nzima ya kupambana na ugaidi nchini.

Mwalimu Njonjo, alisema kwa mujibu wa takwimu za mwenendo wa matukio ya kigaidi ulimwenguni, zinaonyesha kuwa vitendo hivyo kwa kiasi kikubwa hutokea katika nchi zenye Waislamu wengi, na waathirika wakubwa wa vitendo vya Kigaidi ni Waislamu.

“Hali hii imewafanya Waislamu ulimwenguni kote kuwa na hofu mbili, kwanza ni hofu ya ugaidi wenyewe na hofu ya vita dhidi ya ugaidi inayoendeshwa na mataifa kadhaa ulimwenguni ikiwemo Tanzania.” Amesema Mwalimu Njonjo.

Alisema, katika hivi vinavyoitwa vita dhidi ya ugaidi, Waislamu wana nafasi kubwa ya kutiliwa shaka na kutuhumiwa kwa uhalifu huo lakini pia huathiriwa na matukio ya kigaidi kwa kunyanyapaliwa kuliko watu wa dini nyingine yoyote ile.

Mmoja wa wanasheria wanaowatetea Waislamu wenye tuhuma za ugaidi nchini, alisema hali hiyo inatokana na kukosekana kwa tafsiri sahihi ya ugaidi, hivyo kilichopo ni propaganda za ugaidi zinazo nasibishwa na mwenendo wa uislamu, hali ambayo imekuwa ikiwaathiri zaidi Waislamu kuliko watu wa dini zingine.

Mwalimu Njonjo, alitolea mfano Masheikh 36 wa Jumuiya ya Uamsho na Mihadhara ya Kiislamu Zanzibar (JUMIKI), waliosota mahabusu kwa takribani miaka minane ambapo kesi yao haikuwahi kusikilizwa mwisho wa siku waliachiwa.

Alisema, mwenendo na sifa za kimuonekano fulani wa kimavazi ambao ni katika utamaduni wa uvaaji kwa Muislamu hivi sasa unawaweka Waislamu katika hofu, kwani hivi sasa Muislamu kujipamba na utamaduni wa Dini yake ni sawa na kujiweka matatani.

Alitaja hali ya muonekano kwa Waislamu inayowaweka katika hofu ya kudhaniwa ni magaidi kuwa ni kufuga ndevu, kuvaa Kanzu, kuvaa Kofia ya Kibandiko (nusu chungwa), kubeba bakora na kunyoa kipara.

Alisema, Waislamu wanakuwa wahanga wa vita dhidi ya ugaidi kwa kuwekwa kapu moja na watu wanaosadikika kujihusisha na matukio hayo akitolea mfano tukio lililomuhusisha kijana Hamza Mohammed, ambalo Polisi wameliita ni la kigaidi.

Mwalimu Njonjo, alisema siku chache baada ya tukio hilo la Agosti 28, 2021, Inspekta Generali wa Polisi Kamanda Simon Sirro, aliwalaumu wazazi na ndugu wa Hamza.

“Hiyo familia ya Hamza, inajisikiaje? Fikiria ungekuwa baba yake na Hamza, mama yake na Hamza, mdogo wake ungejisikiaje? Kuzaa kwako umetuletea balaa Watanzania. Kwa hiyo, naomba Watanzania wengine wasituzalie watoto kama Hamza.” Alisema Kamanda Sirro, akijibu swali kuhusu hatma ya mwili wa Hamza.

Aidha Mwalimu Njonjo, alisema katika kuongeza juhudi kwenye vita yake dhidi ya ugaidi, Septemba 11, 2021, Kamanda Sirro, alisema anafikiria kuanza kukagua mafunzo yanayotolewa kwenye Madrasa na Sunday School, baada ya kujifunza kutoka Serikali ya Rwanda.

Mwalimu Njonjo, alisema ifahamike kuwa suala la ukaguzi wa mitaala si la Jeshi la Polisi, kwani Tanzania ina vyombo vyake kisheria kwa ajili ya kazi hiyo, ikiwemo Wizara ya Elimu na Mafunzo ya Ufundi, Baraza la Mitihani la Tanzania (NECTA), Baraza la Taifa la Elimu ya Ufundi (NACTE).

Vingine ni Tume ya Vyuo Vikuu Tanzania (TCU), Ofisi ya Rais Tawala za Mikoa na Serikali za Mitaa (TAMISEMI) na mifumo yake hadi katika Halmashauri.

“Utaalamu wa kuifanya hiyo kazi ya kukagua mitaala, Jeshi la Polisi inautolea wapi? Alihoji Mwalimu Njonjo.

 

Latest News