Kiongozi Ikhwanul Muslimina

Misri afungwa maisha jela, Kiongozi wa kundi la Ikhwanul Muslimin la Misri na makumi ya wanachama wa kundi hilo wamehukumiwa kifungo cha maisha jela.

Kwa mujibu wa taarifa ya hukumu iliyotolewa na mahakama ya mji wa Minya, inasema kuwa mkuu wa Ikhwanul Muslimin, Mohammed Badie na wanachama wengine 64 wa kundi hilo wamehukumiwa kifungo cha maisha jela kwa tuhuma za kuhusika katika machafuko yaliyotokea katika mji wa el Idwa, mkoani al Mania tarehe 14 Agosti 2013.

Hukumu ya kifungo cha maisha dhidi ya Mohammed Badie, imetolewa katika hali ambayo hivi karibuni pia Mahakama ya Rufaa ya Cairo ilimuhukumu kifungo cha maisha jela kwa kumhusisha na kesi ya mgomo na kukusanyika wafuasi wa Mohamed Morsi, katika medani za Rabia al Adawiya na al Nahdha mjini humo, baada ya Rais huyo wa zamani wa Misri kupinduliwa na jeshi mwaka 2013.

Aidha Mahakama ya Rufaa ya Cairo imewahukumu kifo wafuasi wengine 75 wa Ikhwanul Muslimin kwa kuhusika na machafuko ya mwaka 2013 na kuwahukumu wafuasi wengine 46 wa kundi hilo kifungo cha maisha jela.

Tarehe 14 Agosti 2013, Rais wa sasa wa Misri, Abdel Fattah el Sisi, ambaye alikuwa Waziri wa Ulinzi wakati huo, alitoa amri ya kushambuliwa wafuasi wa Mohamed Morsi mjini Cairo ambapo mamia ya watu waliuawa na wengine kujeruhiwa.

Mwaka 2013, viongozi wa Misri waliiweka Ikhwanul Muslimin katika orodha ya makundi ya kigaidi na wamekuwa wakichukua hatua kali dhidi ya wafuasi wa kundi hilo.

Kufuatia mapinduzi ya kijeshi ya Julai mwaka 2013, Mohammad Morsi aliondolewa madakarani na huo ukawa mwanzo wa kipindi kingine cha masaibu ya Ikhwanul Muslimin.

Rais Abdel Fatah El Sisi wa Misri anasisistiza kuhusu kuandamwa Ikhwanul Muslimin kwa madai kama vile kuhusika harakati hiyo na vitendo vya misimamo mikali ya kidini.

Hali hiyo inasadikiwa kusababisha kuibuka mgogoro Misri na mgawanyiko katika jamii na hivyo kuifanya kazi ya El Sisi kuwa ngumu zaidi.

Inaelezwa kuwa njia pekee ya Misri kujikwamua katika mgogoro uliopo ni kuwepo maelewano katika uga wa kisiasa nchini humo, ili taifa hilo la Afrika Kaskazini liweze kustawi na kufikia malengo ya juu ya mapinduzi ya wananchi ya mwaka 2011, ambayo yalisababisha kuondoelwa madarakani Husni Mubarak, ambaye aliitawala nchi hiyo kwa miongo mitatu. (IQNA).